Let’s go Rock N Roll：有前有後好兆頭
由 Peter Wong
有前有後好兆頭 - 黃興桂
我一早已同各位球迷、網迷講過，今屆南非世盃決賽周，真係要慢慢睇，先會知邊隊最有冠軍相，邊隊最令人失望。其實，無論係足球，或者係任何運動，都應該向前望，球迷可以緬懷過去的名牌球星、球隊，停留在過去的光輝歲月，但評述員就萬萬唔可以咁；作為專業的評述員，我們的責任就係發掘新球員、黑馬球隊，介紹俾大家認識。
今屆世盃，話咁快就打到分組賽最後一輪賽事，我自己到目前為止，最鍾意的球隊係巴西同荷蘭；巴西就唔使講啦，有好球員之餘，難得隊波在教練鄧加帶領下，防守做得幾好。
至於荷蘭就仲未用盡最好的人腳，好似世界上最出色翼鋒之一的洛賓，雖然傷癒但都未使用到佢；仲有效力德甲球隊漢堡的前鋒艾利亞呢？佢都係打後備咋！其實，荷蘭依家個陣運轉得唔錯，最主要係雙防中雲邦美同尼祖迪莊發揮得好，搶波、補位工作雖然唔起眼，但對隊波好重要，亦係荷蘭至今仍然保住清白之軀的關鍵之一。呢一點，真係行內人先睇得出箇中真諦，外行人係唔會睇得到囉！
其他球隊方面，阿根廷呢隊波同樣係有好多好球員，至於在今屆決賽周可以去到幾遠，就要睇教練馬勒當拿功力。意大利同尋晚在A組分組賽最後一輪輸波出局的法國，就好令人失望，我覺得主要係因為球隊青黃不接。至於較令人驚喜的球隊，就係新西蘭、智利同巴拉圭。
呢幾日會陸續上演分組賽最後一輪賽事，呢個係一個冇得留低的階段；我黃興桂不嬲都講，波係圓嘅，睇波容易賭波難，輸了都唔好賴天賴地，怪只能怪自己冇眼光囉！總之，想知最新世盃消息同戰況，就要繼續留意Yahoo!喇！
是日金句：「永遠向前，永不回望。」
荷蘭冇運行啦...............
唉................
