費托當選世盃最美球星 [復制鏈接]

引用第1樓國球旗於2010-07-08 18:26發表的“”:
最近一個「以貌取人」嘅交友網 Beautifulpeople.com選出世盃「帥哥榜」，貌似張家輝嘅美斯榜上無名，不過點都好彩過喺世界盃運滯到極嘅英格蘭射手朗尼同法國中場列貝利，因為呢兩位球員被選為「醜男榜」頭兩位，應驗一句「一沉百踩」。
Beautifulpeople.com（簡稱「靚人網」）話自己有成 20萬名會員，由佢哋用一個毫不留情嘅計分系統，針對決賽周 32強嘅每位球員樣貌去評頭品足；其實呢個系統好簡單，只有 5個選擇，包括「醜」、「唔合格」、「唔太差」、「靚仔」、「佢好誘人」去畀分。
先講「醜男榜」，唔知係咪「相由心生」，人黑仔連個樣都差啲，排「醜男榜」頭兩位嘅朗尼及列貝利，仲有排第 9位嘅泰利同樣運滯。朗尼賽前被視為英格蘭「孭飛」前鋒，點知喺世界盃完全失準，一球都入唔到，唔知係咪咁，搞到佢喺「靚人網」選舉入面成為成支英格蘭隊嘅得分新低，做咗「醜男榜」老大。同樣「樣衰」嘅列貝利及泰利，賽前曾捲入性醜聞案，一個生日召雛妓、一個搭上前隊友布歷治前女友，終於喺世盃無甚作為。
至於「帥哥榜」，邊位會係你杯茶呢？排首位嘅意大利隊長簡拿華路，爆咗小冷門擊敗西班牙「王子」 F托，榮膺「帥哥」 No.1，叫做幫分組賽出局嘅意大利攞番個安慰獎，排第 3係神射手大熱嘅西班牙前鋒韋拿。冧死唔少女粉絲嘅卡卡同 C朗，則分列第 7及第 8位。至於周秀娜鍾意嘅美斯，喺阿根廷隊內都只喺排第 2，輸畀希古恩，上唔到「帥哥榜」。
.......