我自己覺得今次既「變相公投」係失敗的，原因係投票人數，而唔係投票率。睇投票率係多餘的，一個正常既立法會選舉都只係得40%+，今次係建制派既杯葛之下，一定無可能係呢個數字之上。但係係投票人數黎睇，比起以往泛民既支持人數都少左成三十幾萬，究竟係乜野原因呢？
就拎我自己做例子，我尋日都係掙扎左好耐，最後都決定去投票。首先點解要掙扎？因為我本身並唔贊同呢類激進抗爭手法，去投票的話就好似變相支持呢類手法。但係另一方面，唔投票的話，就好客易俾政府歸納埋所謂既「主流民意」，好似變成支持現時既民主步伐。係權衡兩者之間，左右都不是人，最後都係去左投票。但係好多人，包括我太太，結果都係無去投票，原因係真係無辦法支持呢類抗爭手法。
所以呢類「非黑即白」的抗爭手法，去威迫人去表態，是否得人心，會否成功？係香港呢類政治冷感，大多數人較溫和的社會，基本上一開始就註定會失敗。而家咁樣，結果只係俾政府一個藉口去將唔投票既人歸納為支持緩慢民主步伐，對整個民主進程有何幫助？
