今日聽到鄒凱光 (903DJ) 一段有關利迷意見, 本人是利迷, 感觸良多!!!!
利物浦係80年代，曾經稱霸英格蘭嘅球壇，路殊、杜格利殊、班尼斯等等球員，嗰波落咗佢哋腳，除非你用超技術，否則你都無咩可能搶到佢哋嘅波。但係，後來曼聯嘅費格遜皇朝開始之後，係此消彼長之下，利物浦就開始越踢越不滯，差到連一直捧利物浦嘅老牌球迷，都唔敢承認自己嘅身分，事關家吓捧利物浦，往往會令捧場者好尷尬。
首先，如果利物浦係一隊好似韋斯咸、維拉呢啲中遊嘅球隊，十場波，只要打三場好波，贏輸都係其次，作為Fans，已經好滿足，但「利記」作為Big 4嘅球隊，大家對佢總會有期望。雖則說，Big 4都會有球隊係排第四，都唔係隊隊係曼聯咁，但如果「利記」擺出嚟嘅實力，只可以係爭三三四四嘅球隊，作為「利記」嘅球迷嘅心態，可能會容易啲調節。最慘，「利記」每次都係畀好多希望班Fans，當大家一瞓身支持，佢就十次，有11次都會令大家好失望，而當你放棄嘅時候，佢就突然會復勇，令想放棄嘅球迷唔捨得，再去捧場，然後又再次令球迷失望。
幾年前，對AC米蘭嘅歐冠決賽，就係一個好好嘅例子。上半場輸梗三球，大家都準備去瞓咖喇，佢竟然可以下半場追返平手，最後仲攞埋個盃添。而今季嘅「利記」，由開季到聖誕節前，形勢大好，大有打敗曼聯奪得英超冠軍之勢，捧「利記」嘅球迷，點會唔瞓身支持啊？點知大好嘅形勢，竟然可以連和四場波，由帶住曼聯到反被曼聯拋離五分，仲要幾場和波，都係贏波領先下，完場前被對手逼和，作為「利記」嘅Fans，點會唔心傷透啊？
於是，大家都會覺得，今年依然係曼聯機會會大過「利記」好多，大家諗住放棄，點知佢又係主場贏到車路士，爭標嘅機會又重燃番希望。我哋一大班Fans又要自圓其說，認為「利記」只要保持係呢場嘅水準，唔好再失分，到作客曼聯嘅時候贏到嗰場六分波，咁攞英超冠軍應該係有可能。但通常係未對曼聯之前，佢都會無端端失分畀啲弱隊，好似嗰啲樸茨茅夫咁樣，令你完全失望。但到曼聯嘅時候，佢又贏番波，總之不停畀希望你，而不停令你失望，然後又好似有希望。
所以，又難怪啲球迷會話，「若然要生活過得好，千祈唔好捧利物浦」，尤其係我哋呢啲年紀，真係受唔起呢啲高高低低嘅刺激，「利記」，你放過我喇。
