Ajax:等睇政府出古惑招玩野[表情]
(2016-09-04 22:38) 
100毛
Page Liked · 19 mins · Edited ·
「唔好意思，根據紀錄，你個名已經投咗票。」
當你的一票，唔再係你的一票。到底係巧合，定係黑幕？
25歲劉先生一直關心政治，今次立法會選舉，亦都有去票站投票。但係排隊到佢時候，發生咗一件匪夷所思的事。
票站人員清晰咁表示，劉先生個名已經劃線。咁代表，已經有人以劉先生的名義行使公民權利；又或者，係一次不美麗的誤會。
「我唔敢斷言我一定係『被投票』，可能只係票站人員犯錯。但呢個錯要好多巧合：要有人同我名好似、身份證號碼同埋個樣都似，佢先可以劃錯線。」
而最恐怖的可能性，就係有不知名人士，用非身份證正本的文件，成功喺官方票站投票。
如果屬實，選舉制度等同作廢。
「我一再強調，我今屆係第一次嚟票站，無可能投過票。於是票站人員作出一個建議 — 佢話可以畀多張選票我，但係張選票，係無法律效力。我完全唔知有咩意義。」
劉先先覺得事態極之嚴重，決定馬上追究，並要求翻睇錄影帶。但係現場職員聲稱無安裝CCTV，最後決定為劉先生抄錄事件，但係過程就令人更加無奈。
「當我睇返份筆錄，佢根本無寫我係第一次去票站，要我強調要加返，佢先作出修改。佢亦無寫低第二張選票無法律效力呢一點。」
事件亦不禁令人聯想起，今日有人用身份證副本都成功「闖關」投票。呢個漏洞之下，到底作為選民，你的身份，仲係咪屬於你？
選委會主席馮驊今日講過，選民係要出示身分證明文件以取得選票…不過唔一定用身份證，只要票站人員信納就無問題。
當標準由客觀變成主觀，呢個制度，香港人仲可唔可以信納？
「我的公民權利，喺今屆，基本上已經失去咗。但係我唔可以由得佢。今晚、聽日，我留晒畀大家。發生一件咁嚴重的事，關乎呢個香港，大家絕對有需要去知。」
今次到底係極嚴重失誤，定係代表制度崩潰？劉先生寧可係前者，至少，佢仲可以相信呢個香港。
今屆立法會選舉，投票人數勢破歷年紀錄。當中有幾多係真，又有幾多…只係被當真？
（資料來源：事主劉先生）
[ 此帖被羅力亞在2016-09-04 23:41重新編輯 ]
