呢個係一個永遠無可能有答案既問題。重點只係點樣平衡兩者之間既利益。只要兩者都得到利益，兩者都尊重同重視對方既利益，關係就可以保持。任何一方只要稍稍尊橫獨裁，都一定會破壞中間既平衡性。
其實球會領隊並非唔想自己既球員代表國家隊。你睇周不時都有人出黎話自己隊波邊個邊個應該入選，就知道，大家都以入到國家隊為榮。而且亦的確可以為球隊帶黎實際既利益（入到國家隊，球員更出名，球衣都賣多件，轉會市場叫價更高）。只係，球員都係消秏品。其中一方過分耗損呢件消耗品，另一名「用家」自然唔老黎！仲要係一邊要比錢，一邊唔駛喎，就更加麻煩。
我地成日鬧既艾歷臣，當年係呢一方面就處理得甚為圓滑。佢知道d 球員係球會財產，「借用」個陣會好錫住黎用。尤其係d 無關痛癢既賽事。十一個人換足十個人，就係佢諗出黎既「屎橋」。一方面賴係人人有機會上陣表現，另一方面，其實正正係向各大球會頭頭表態：「拿，我唔會用殘你班球員架，頂多打半場就收起架啦。」所以佢掌政之時，同各大球會關係的確係唔錯既，好少聽到有爭人用既爭執。
法國領隊星座小王子係呢方面就差得多囉。
