我無睇過佢踢波。基本上我好難評論佢有幾勁。勁成點。只能跟據所得既資料去分析：
1. 球王片：球王片雖然只係SHOW 哂一個球員最佳既表現出黎。並唔係佢真正全面既反映。但至少，你會見到佢真係曾經有呢D 表現。佢既打法，佢既腳法，佢既習慣‥‥‥‥等等。有D 球員，球王片都不能令你動容時，你就知佢好打有限啦。球王片不等如整個球員既全面反映，但點都反映到D 野既。係球王片到，我睇到利馬有一定既腳法、速度、足球智慧………等等。呢個係你去評價一個球員時（當你無睇過哂佢既比賽）既一個參考。
2. 數據：數據唔代表一切。但數據一定唔會呃人。長時間既數據更加係客觀既事實既反映。一個球員，一季有咁多入球同助攻。呢D 數字唔係作出黎的。唔係主觀既網站評分。係實實際際由每一場賽事，點點滴滴咁累積番黎的。而且唔係一季既數據，唔係常見既，得一季好波下季無影。係連續兩年既數據。數據絕對係評價一個球員既其中一項十分重要既資料。而利馬既數據亮麗！
3. 其他人既評價：法國國家隊正選。呢個就係其中一項「其他人既評價」。法國國家隊領隊，係一眾星光熠熠既選手群中，選中佢作為正選。佢要打低一大班競爭對手，例如曼聯既馬迪爾，先會搶到呢個正選位置。呢個身份，一定程度上已經反映佢既實力。除非現任法國國家隊領隊係廢柴，好似當年既星座小皇子一樣，選人睇星座。否則，你要解釋到，佢唔係憑實力咁係憑咩野去拎到宜家既正選位置。你無其他更有力既解釋，你就無理由否定佢係憑實力去爭到呢個正選位。另外，一眾球探都向球會推介佢。車仔、阿仙奴、利記都爭住想簽佢。呢D 都反映左佢係其他人眼中既實力。佢既身價，更加反映佢係現今巿場既價值。呢D 都係一定程度上，客觀既標準。甚至比起我地球迷睇三幾場電視直播然後就扮哂專家咁，純粹靠個人主觀喜好去評價一個球員，黎得更加客觀。因為佢地既評價，動輒涉及幾千萬磅既交易。唔係茶餘飯後既論壇吹水。係專業既評估。
以上三項，任何一項可能都未必可以客觀咁評價到個球員價值。但三項都包括哂既時候，我諗雖不中亦不遠矣吧。
