Peter雖然成日講淘汰賽咩事都有可能發生，變化萬千又係足球引人入勝之處，不過今晚德國對希臘應該係八強入面最難爆冷嘅一場，日耳曼大軍今屆人才濟濟，四線實力好平均，無論前線嘅馬里奧高美斯以至負責把守最後一關嘅紐亞都咁穩定，整體演出拍得住七四年全盛時期嘅西德隊，唯一不足係場上欠缺一名好似碧根鮑華般嘅領袖人物，但以目前人腳依然係Peter心目中嘅奪標熱門。
捧2.95倍「冠軍」
希臘今屆再以神話姿態進身八強，分組賽最後一輪淘汰俄羅斯充分發揮佢哋最強嘅穩守突擊戰術，但正所謂久守必失，而且呢招亦唔係對住每支球隊都有效。德國向來以紀律強見稱，球員心理質素強，甚少自亂陣腳，希臘勢難死守至完場，足智彩主Ｗ賠率熱至1.28倍可見形勢一面倒。
從博彩角度分析，今場主Ｗ太熱冇肉食，建議大家可以投注德國「冠軍」，目前有2.95倍分頭算不俗，有較高回報率，而且同時可以考考自己眼光，估吓德國係咪可以一如所料打入決賽，增強睇波趣味，捧埋盃就更開心。
金句：德國四線好平均 希臘神話難再現
