首場賽事，主場對維拉，賽前人人看好！維拉亦係本季被看低一線既球隊。結局係，阿仙奴先失一球，幾經辛苦先可以迫和維拉。
第二場作客曼城。曼城爛打，阿仙奴上季作客成績又差強人意，都估到呢場係硬仗一場。但最多諗住未必羸到，邊個會想到，阿仙奴會一比零慘敗於曼城腳下。兩場波，得一分。成為四強之中開季開得最差既一隊。
問題係邊？
人人歸究係亨利身上。亨利無態，間接令到阿仙奴打唔出水準。亨利慘成千夫所指。呢個，真係阿仙奴今日所遇到既問題？若然個答案係「是」既。咁問題好易解決者。唔比亨利打正選囉。咁掂哂囉！但若然係「非」，唔找出問題所在，對症下藥。亨利首發定後備。似乎都唔會影響大局。
我絕對明白大家對亨利既失望。但失望係因為黎自期望。大家對亨利期望過高，先會咁失望！
大家都話，亨利令到阿仙奴變成一人球隊 。是耶非耶？無亨利既話，阿仙奴真係可以打得更流暢……我個人好有保留。
早幾年我寫過篇「阿仙奴進攻模式」（見附錄一），文中提到，阿仙奴既進攻起動點，分別黎自韋拉既反擊，皮里斯既突擊，兩閘（尤其係左閘）既側擊，同埋，最後，亨利既個人突破能力。
阿仙奴既辦數，係多變同多樣化既。
宜家，無左韋拉，大家都一厢情願地認為，法比己經完全取代韋代。可惜既係，事實並非如此。法比將會取代韋拉，我亦相信佢有能力取代韋拉。不過，呢一刻，佢並未完全取代韋拉。我相信佢只能發揮到當年韋拉係陣中約六至七成既功能。無疑，係分波方面，法比係好好既。比既直線都好毒。但係反守為攻呢個層面上，佢比之韋拉都仲有一段距離。尤其係攔截方面，佢無左韋拉個分狠勁同直接。一招了咁將對方既攻擊全面瓦解。然後係個千分一秒已經有人走位配合。韋拉可以睇都唔睇就將個波傳送到致命既位置，自己隊友又好有默契咁一早跑到個個位。呢家波，先係阿仙奴最攞命既一招。宜家幾乎唔見哂。
又例如龍格堡，亦發揮唔到佢以前既作用。一則佢既高峯期已過。二則，佢並唔係以壓落底線出波為主打。反而係由側邊殺入禁區攻門為主要作用。但要做到呢點，佢需要一條橋！就係柏金、皮里斯同韋拉等人。佢無能力一個人突破對手既防線殺入去，佢唔係朗拿度個種球員。但卻善於用小組陣地戰，以簡單既三角短傳撕破對手嚴密既防線。往往可以二打三甚至二打四都殺到入去。射門既把握能力亦高。但自從上述三人離去，佢已經搵唔番條替補既橋樑。唔單止係佢。整隊阿仙奴都突然失去呢類千鈞一髮既瞬間殺入敵陣既小組攻勢。令到阿仙奴只能夠好似大家呢幾場咁見到既，係外圍搓黎搓去，就係搓唔入肉。所以大家睇到好激氣，問題係，隊中仲有幾多個球員可以作出呢類三角短傳？真係係人地禁區以極快既速度，極險既角度黎組織。雲佩斯技術上可以但性格上唔肯咁做。艾迪巴約……咪講笑啦。施華算係阿仙奴中較粗技大葉個個，佢做唔到。亨利……佢可以做到，但個層次太高，班新仔配合唔到。走唔到亨利希望佢地走到個位，一個以前皮里斯、韋拉、柏金都識走去既位。所以大家見到亨利成日傳失波。其實唔係佢傳送差左，係接應個班差左！
兩閘既側擊更加唔在講。左閘無左高爾，大家再話無相干，有人可以頂到，純屬自欺欺人。高爾係世界一級左閘！係英超第一！你搵其他頂級強隊既正選左閘黎頂佢都未必可以做番佢既工作。何況係搵個後備甚至係後備既後備，甚至原本都唔係打閘既黎客串？阿仙奴宜家無翼無閘……完全無側攻可言，第二家最殺食既波都無埋。
然後去到前鋒。艾迪巴約可以補償高空進攻呢個阿仙奴一直以黎既弱點。但把握能力一直為人疚病。雲佩斯個人技術係有，但同亨利完全夾唔到波。自己有自己打。殺到入禁區又比唔到好既傳送。龍格堡亦由高峰期滑落。無左柏金既配合，龍格堡最厲害既中路入攝完全無機會發揮。亨利就係要同呢班友仔夾……你仲最佢點？
以前，亨利係打最前個個。有波到腳，佢咩都唔駛諗唔駛煩。自己舞入去自己射！點解可以咁做？因為空位多嘛。又要守住龍格堡，又要守住皮里斯，顧得左邊個高爾，右邊羅倫又殺入黎。守得兩守，個防線都已經比人撕開哂。亨利就梗係可以入去跳舞咁跳啦。
宜家，一個禁區敵人連自己人，十幾人圍係到，你叫佢點舞？傳黎傳去就係撕唔開對手既防線。班新仔前鋒又唔生性，走位唔到，傳送失準。亨利又要墮後上腳，又要策動進攻，跟手又要自己射埋……你估佢真係神咩！？
亨利一個人承擔成隊波既所有入球重責。係無人可以分擔佢既工作既情況下，佢己經漸漸變成唔係做緊自己最擅長既工作。就好似，一個原本係自由自在既創作畫家，創意無限，你迫佢日日只係坐定定係到抄畫，COPY又COPY！係呀，佢係有技術畫得靚。但D畫係無靈魂既，無生氣既。因為佢已經唔再係佢。
要解放亨利，唔好期望亨利一個人自己可以改變D咩，要期望阿仙奴整體上有所突破同改進。否則，亨利一個人幾超人都好，都無可能做哂十一個人既工作。
阿仙奴唔係無引進新兵。上季，今季，都不停引入新既戰力。但似乎，對辦岩用既唔多，夾唔黎既反而唔少。
暫時睇，希比同路斯基都係適合打番中場中。尤其係希比。佢唔算有速度，突破能力並唔係黎自直線運球，而係黎下高超既護球技術。呢種技術，並不適合用於邊線既突破。反而更適合係中路，尤其係禁區附近控球，策動進攻。因為係呢類心臟地帶咁樣控住個波，一定引黎一個以上既防守球員黎搶截。當引開幾個防守球員係，對方防線就會出現漏動。
問題係，宜家希比又係中路，法比又係中路，施華又係中路，就算希比係禁區附近護到個波，佢都唔知交得比邊個好。次次都要等到右閘既伊保殺上黎先有對象交波。左路完全無人可比。咁就完全失去佢既護球能力既作用。因為根本就係原地控球，分唔到個波出去。所以大家經常見到希比護住個波十幾秒都交唔出，變成困局。
希比成日由左邊推去右邊，又由右邊推番去左邊。推黎推去就係唔出波。原因只有一個：搵唔到人交波。搓足半場，係幾對腳插黎插去既情況下努力護住個波等機會送出。但係等黎等去都等唔到有岩既對象。呢個就係宜家阿仙奴個困局。
但我認同，希比同路斯基，基於自己善長既位置既原因，經常都有意無意移入中路，令中路大塞車。兩邊又拉唔開。我地宜家講緊車仔既問題，其實同時係阿仙奴既問題。
拉唔開兩邊，唔單止係拉唔開個闊度，同一時間，亦係拉唔深個深度。因為無人壓落底線再出波，球員總既活動範圍全被限制係一個好有限既空間到。仲要係企滿人既空間，所以，亨利根本無辦法發揮佢最厲害既殺著。個人突破。點突破者，走唔夠兩步身邊周圍都係人。有時仲要係自己人阻住哂……
路斯基係呢方面應該可以做得比希比好。佢只係第一場落場，夾唔到波都好難怪佢。但係咪真係可以達到預期效果。咁就要睇多兩場先知囉。畢竟，阿仙奴當年整隊既默契性，係夾左好多年先夾到番黎。並唔係隨隨便便插個人入黎就可以做得番同一個效果。似乎，宜家阿仙奴唯一可以打破困局既契機，就全然係哂路斯基一人身上。佢能否改變自己既打法，配合阿仙奴既需要，分分鐘就係阿仙奴能否谷底番身既最關鍵所在。
當然，大家仍然可以期望禾確特為阿仙奴帶黎奇蹟。就好似早幾個月人人期望佢為英格蘭大軍帶黎奇蹟一樣。至少，雲格都肯用佢哎。
[ 本文被freezefox在2006-08-29 20:16重新編輯 ]
