如果我係你，我會咁排（拿，純粹睇GOOGLE MAP，無查過有冇巴士到架，雖然應該有既）。
DAY 1 夜遊名古屋
由於你到達到四點半，CHECK OUT 埋五點幾。再搭私鐵出名古屋巿。出到去都接近六點了。不如搵間好少少既餐廳，舒舒服服食餐飯仲好啦。聽講有間鰻魚飯好出名的。我上次無試到。你去試下。有時間可以去行下佢D 咩通物通。都可以行到九點幾十點架。早少少返酒店訓。第二朝晨咁早出發。日本好早天光。好快日落。唔早少少出發玩少好多野。
DAY 2 名古屋 －－ 松本巿
名古屋出發，搭巴士去馬籠宿。行下呢條咁有特色既古道。車程不過係個半鐘到。唔駛搭到人都顛。由馬籠宿去松本巿。又係個零兩個鐘。車程唔算長。如果嫌得一個景點唔夠喉。可以加插位於馬籠宿同松本巿之間既千疊敷。位於長野縣駒根巿。去到駒根巿要再搭接駁巴士同埋纜車先上到山。個到秋天睇紅葉，冬天睇雪景。但你去個陣有冇雪景睇我就唔知了。
但呢個行程有個好大既問題要考慮，就係行李。唔知行李可以放係邊⋯⋯⋯⋯如果唔係，可以考慮日頭先遊名古屋，然後再真接搭巴士去松本巿。放低行李係酒店，先去遊松本巿都得。但前後車程三個幾鐘。會有少少悶囉。
DAY 3 松本巿 －－ 白骨卅 平湯 卅 奧飛驒 卅 新穗高溫泉。
日頭先係松本巿玩。食埋午飯先出發都唔遲。向西邊進發，就係白骨、平湯、奧飛驒、新穗高等各各溫泉區。全部都係個零鐘到兩個鐘車程之間。如果唔係有特別喜好，我會推介白骨溫泉。因為有特色D 嘛。新穗高唔係唔好，我住個間號稱有全日本最大露天溫泉添。但稍為偏遠囉。個陣係因為想去新穗高高原睇紅葉先揀呢到。否則，白骨、平湯等溫泉會較為方便同近D。溫泉區又有溫泉街可以行下。新穗高個邊咩都無架。好僻下架。黃昏入住，先浸個靚浴。再品嘗酒店既晚饍。無敵！呢日唔駛趕頭趕命，又無行李問題。簡單。
DAY 04 溫泉 －－－ 高山巿
食完酒店既早餐，出發到高山巿。車程個半鐘。放低行李係酒店後，可以馬上再出發去白川鄉。又或者係附近行個圈先再出發。視乎情況同你打算用幾多時間係白川鄉。由高山巿去白川鄉都係一個鐘車程。食埋午飯先出發都得。但趕少少。夜晚趕返黎高山巿，一定要試佢地既飛驒牛！頂級推介。我到時比間餐廳你。平靚正。八千幾YEN 一個飛驒牛BBQ 套餐，兩個人食唔哂！
DAY 05 －－－ 高山巿 －－ 名古屋
高山巿返名古屋要兩個幾鐘。再搭埋私機去機場，又要九個字。你五點幾機。即係三點幾要到機場。食完午飯12 點好出發了。又或者安全D，早少少出發，寧願返到名古屋先食午飯。費時有咩意外，時間失算。所以呢日 都係唔會安排咩節目的了。除非你自駕，咁沿途都仲可以停一兩個景點HEA 下既。
[ 此帖被freezefox在2014-11-18 01:02重新編輯 ]
