首先，唔係你話唔夠班就係唔夠班既。你點定義利物浦唔夠班？今屆車仔排名高過利物浦，所以佢唔夠班？咁上屆車路士排名低過利物浦喎。咁上年車路士係咪都係唔夠班？你話唔係淨係計一屆半屆既。咁計幾多屆？十年、廿年定三十年？計球會歷史既話，利物浦係頂級聯賽拎既冠軍多過車路士多多聲喎。就歐聯冠軍，車路士都望塵莫及啦！你可能又會話，呢D咸豐年前既事啦！仲攞黎講。咁唔講咁耐，要講幾耐？講廿年既話，曼迷第一個走出黎，指住你個鼻同你講，你車路士拎過幾多屆冠軍呀？拎多十次八次先好出黎也文也武啦！係我地面前話人唔夠班，我就真係話你唔夠班呀！講十年八載，咁阿仙奴都無冠多年啦，我諗呢到無人會目空一切到話阿仙奴唔夠班掛。淨係講呢兩三年？我又唔覺你勁過曼城幾多喎。
不如淨係講車路士拎冠軍個年啦。好冇？就哂你啦。
呢D 咪係勝利球迷囉。球會成績稍為好少少，就出黎叫囂。我諗就算摩連奴、雲加、雲高爾都未敢輕視利物浦。無一個打算爭標既英超強隊既領隊、球員，會唔將利物浦視為競爭對手之一。只有暴發如土豪者先會有如此短視既目光。言論令人失笑。
一隊球隊夠唔夠班，一大堆因素左右。球隊既往績，球隊既歷史，球隊現有既財政狀況，球隊既可發展潛力，球隊既青訓，球隊既方針………在在都影響緊一隊球隊，能否係英超最激烈既爭標位置上佔一席位。無可否認，利物浦近年成績下滑，但我唔認為有任何一隊競爭對手夠膽輕視呢隊傳統勁旅。而且利物浦仍有一定既潛力同可塑性。有時一隊波，撞岩一個好球員，可以成隊打高兩班。上年既蘇亞雷斯就係一個好例子。佢加盟利記時，唔見得係球皇級人馬。但一起可以係利記打起。史杜列治既加盟，人人睇淡，結果相反。只要搵到一個好球員，利記要爭冠軍唔係無可能。情況同車路士上年一直搵唔到一個可以入球既球員一樣。車路士人腳，上年同今年變動其實唔算好大。就係因為搵到一個哥斯達，成隊既平衡性就好好多。今年成績先有明顯既進步。
今年個冠軍都未落到手，就已經目空一切。夜郎自大了。講呢D 說話，只係暴露你如何無知吧了。
[ 此帖被freezefox在2015-03-27 16:44重新編輯 ]
