我在海洋公園受盡大陸人折磨的日子
有好多人都會覺得能夠係一個屬於香港人的老牌主題樂園工作，應該會好開心，我諗呢篇文章會可能令你哋更加唔想入去公園做，唔係同事與同事之間的問題，係喺成千上萬來自全世界嘅遊客之中，來自強國嘅旅客係令人極度討厭，我眼見外間有好多文章都係用自己遊客身份講入去玩嘅經歷，今次我會選擇用一個過來人前員工的身份，講下我哋員工係公園工作的辛酸事。我之前係公園做咗差唔多接近一年嘅時間，大家都知海洋公園咁大，一定會有唔同嘅區域，而我係一個海洋天地嘅員工，你哋唔知咩叫海洋天地唔緊要，我講少少資料你哋一定會知，全海洋公園只得一個有摩天輪嘅區域，我咁講你哋一定會知。回想起當日抱住興奮嘅心情，知道能夠可以去海洋公園工作，一定會比之前的工開心好多，話晒都有好多同自己差唔多年紀嘅同事，一定會好開心。誰不知一返工就係惡夢嘅開始，我每日都要帶著自己個老母返去俾大陸人問候。我本身係全職員工，我會從海洋生物展館開始講起。有少少基本知識嘅人都知，海洋生物展館係唔俾人飲食同用閃光燈影相，我每次做中華鱘同水母館都發覺大陸人好鍾意唔守規矩，就算你好聲好氣用普通話同佢哋講，佢哋都係一樣唔理你，我試過有香港人向我哋投訴，但我哋可以點？我哋控制唔到嘅時候去搵上司，上司嚟到唔係去幫員工，係睇住你點死，點俾大陸人罵。至於海獅同海豹館，雖然佢係一個半室外半室內嘅地方，仲可以近距離接觸，但問題就出現啦，佢哋可以乜垃圾都掟入去畀啲動物玩，例如：卡片、紙、麵包等等，差啲害死啲動物。管理機動遊戲係我日常最主要嘅工作，喺呢部分我接觸得最多大陸人。你哋都知道唔同既機動遊戲都會有唔同嘅高度限制，佢哋班大陸人都可以唔夠高嘅都衝入去你部機到，阻住其他客，你同佢哋解釋完，佢哋都唔肯走，死都話我要玩我要玩。喺海洋摩天塔（OPT）發生得最多嘅係佢哋好鍾意打尖，OPT 係全公園最多大陸團出現嘅地方，佢哋打尖方式係可以勁到，將你掛係排隊區既鏈全部拆晒，一係就有其他客排緊，當你睇唔到嘅時候佢哋就會捐晒入去，當有客投訴，叫我哋員工叫返打尖嘅人出嚟，佢哋班大陸人就扮晒野，死都話排緊隊，搞到我哋有時做OPT係非常之燥。至於過山車、搖擺船、跳樓機、鞦韆，大陸人好鍾意唔放隨身物品落個儲物櫃，無論你點同佢哋講，佢哋都唔肯放，而我試過喺摩天輪揸機的時候，佢哋好鍾意喺車廂入面企起身同食野，最離譜嗰次仲喺車廂度食煙。最大問題到海洋劇場同纜車排隊區。先講海洋劇場，去過海洋公園都一定會知海洋劇場好多人睇，差唔多場場爆滿，每當冇位嘅時候，唔再俾客入場，大陸人就會去罵我哋職員，我試過比佢哋推撞、用水淋，甚麼不文明行為全部都經歷過，至於你哋一定會問有冇人周圍屙尿，係有，仲要多到你唔信。至於纜車排隊問題，大陸人打尖已經係家常便飯，基本上你哋諗到嘅方法班大陸人都同你做齊。延伸閱讀：
【高大衛：我在海洋公園惡戰大陸旅客】http://www.passiontimes.hk/article/08-13-2014/18318
