9月仲有一半就完喇，但加埋歐聯同聯賽盃賽程，曼聯下半部份可以話硬仗連連，依家就等專區同大家作個小小分析…
2012年9月餘下賽事：
9月15日——曼聯 對 韋根
9月19日——曼聯 對 加拉塔沙雷 (歐聯)
9月23日——利物浦 對 曼聯
9月26日——曼聯 對 紐卡素 (聯賽盃)
9月29日——曼聯 對 熱刺
小評：
早前兩場聯賽對富咸同修咸頓，全取6分，但係後防表現的確係麻麻地，拉菲爾同艾夫拿都不穩，里奧同維迪久疏戰陣下，狀態不復當年勇，而伊雲斯啱啱傷癒，菲爾鐘斯同史摩寧又傷，後防晌無咩人用嘅情況下，的確希望上陣嘅生生性性，而筆者亦好期待新兵畢特拿上陣時嘅表現。
畢特拿表現令人期待...
上季季尾輸咗俾韋根，全失3分，原本返到主場出戰對韋根，應該3分無咩問題，但除後防外，朗尼、香川真司同尹佩斯都受傷，相信就算贏波，都是小勝而回，而前線入波重責，要交棒俾韋碧克同埋「小豆」喇…
周六對韋根一戰，要靠「小豆」同韋碧克前線肩負入球責任...
對韋根場波，其實贏波都好緊要，事關幾日後歐聯就開戰，雖然今年小組賽感覺上唔係好難打，而第一場又晌主場出戰加拉塔沙雷，有主場之利下，信心都應該OK，但都唔可以唔打醒12分精神，事關近年嚟到奧脫福作客嘅歐聯球隊，表現一啲都唔差，正如去年嘅巴素利咁，都有少少滑鐵盧嘅風險，所以如果對韋根能全取3分壯一壯聲勢，等對加拉塔沙雷，以及23日「雙紅會」作客對利物浦，可以晌士氣高昂嘅情況下迎戰喇…
「雙紅會」必定係今個月嘅焦點，近幾年去親晏菲路，都好似多數失分而回，雖然對手近期狀態麻麻，但不得不承認佢哋近年對住曼聯都打高一班波，絞成「五五波」，到時希望尹佩斯、香川真司等紅魔兵復出之餘，更打番傷前嘅水準，而後防更要有表現改善…
他們兩個必定係「雙紅會」焦點...
及後聯賽盃對紐卡素，亦係一場硬仗，大家都應該記得上年兩戰紐卡戰都敗北而回，更可以話係技術性擊倒，呢場波的確好睇費SIR用咩人去打，以佢一貫風格，都會先以二線兵打聯賽盃頭幾輪賽事，但今年一抽就抽中紐卡素，想晉級都真係需要一班正選上陣，但好可惜3日後仲要對熱刺，一啲都唔易打，相信要呢兩場波都贏，應該要好考費SIR輪換功夫，點樣晌球員輪流休息下而唔影響成績…
聯賽盃首戰對紐卡素，都的確係近年抽得無咁好嘅籤...
