但係，進步還進步，同曼城既差距仍然係好明顯。呢方面唔到你控制。你打得好，人地比你打得仲好。無計。
曼城今季其實亦無咩邊個特別好標青。但整體發揮就係好。成隊變得更成熟。無左迪布尼，對佢地係零影響。呢樣先係一隊波應該追求既境界。無左邊個都無大問題。當然，要做到呢點，就要其他球員都有進步。今季既史達寧，令一眾恥笑佢既球迷都要收聲。哥帥係掂既。你無得唔認同。連史達寧都教得咁好。史寧、辛尼、馬列斯，三個既輪換又做得好出色。令佢地有良性競爭之餘，又唔會坐到硬哂，三個都KEEP 到戰鬥狀態。呢方面摩連奴完全輸哂！就算高普，都未必做到佢一樣既效果（只係暫時，我對法賓奴同沙基利黎緊既表現好有期望）。買唔到佐真奴，佢又無大問題喎。唔會死螺住個個位一定要買人。就用番現成既個兩件。又過到骨。曼城手上係極多好球員，但講真，都要你識用先得。
細施華上季坐左一季咁滯。今季大熟大勇。同施華合作無間。估計下季施華如果要退落黎，佢完全可以接棒！曼城個皇朝先可以延續落去。人地打造 一個皇朝，眼光係要放遠D 的。要睇幾年的。唔係話淨係靠個一季買一大堆人番黎，唔岩用又賣哂出去。再買番一大堆人過黎。咁樣買買賣賣，連夾波既機會都無。邊可能會有好成績。
球隊一定要建立一套自己既風格，打造球隊既骨幹。然後每季補充新血。先可以長時間打出好成績。高普其實宜家都係做緊同一樣野。只係，佢比哥帥遲開始，手上資源亦無哥帥咁多。至少第一年係無咩錢可以用。上季先開始真係叫補強球隊。要佢係一兩年間就追到曼城既地位，係有少少強人所難。但再比D時間佢，一定可以打造出利物浦既黃金一代出黎。
[ 此帖被freezefox在2018-11-13 10:27重新編輯 ]
