普巴走咗拉比奧特嚟
難道曼迷未夠難？
輸完畀白禮頓，曼聯管理層即刻做嘢簽人，終於同紅魔扯上關係既名字唔再得法蘭基迪莊。但阿拿奧杜域同拉比奧特呢兩個名，相信大部曼迷第一反應都係「唔係下話」，季前先話送走啲麻煩友，點解家下又整兩個麻煩友。果然，曼聯因為阿拿奧杜域上年喺歐國盃牽涉種族言論決定放棄斟介，但拉比奧特睇嚟就勢在必得。
今季拉比奧特早早就喺祖雲達斯清洗名單入面，一來因為佢逗緊隊內數一數二高700萬歐元年薪；二來係普巴嚟咗之後，中場已經唔多再需要佢。唔少球迷質疑，究竟拉比奧特比萬人齊插既「費麥組合」好得幾多，有外媒將佢上年數據同麥湯文尼比較，其實都係咁上下。充其量只可以話技術好啲，進攻好啲，大賽經驗豐富啲，不過以1,500萬鎊嚟講係好使好用。
但拉比奧特最大問題唔係佢本人，而係佢阿媽，亦係佢經理人既維朗妮。12年拉比奧特出道冇耐，本身可以跟PSG去卡塔爾踢熱身賽，但因為阿媽冇受邀一齊去，所以決定退隊。14年時任PSG教練白蘭斯將拉比奧特燉落預備組，結果維朗妮去停車場等白蘭斯激烈討論，仲搞到要報警。早幾年拉比奧特同PSG擘面，因為咁被雪，佢阿媽就對外公開話自己嗰仔係球會既人質，仲講到阿仔好似被人囚禁咁好慘。到咗上年歐國盃法國16強出局，麥巴比互射12碼宴客，維朗妮喺看台同麥巴比老豆講，「教下你個仔，叫佢唔好咁自大」，差啲搞到講手。
當祖記要清洗拉比奧特時，維朗妮就表示過要帶個仔加盟影響力更加大既球會，而呢位阿媽真係做到。家下曼聯其中一個難關就係要同維朗妮傾好拉比奧特個人條件，亦係各大傳媒焦點所在，大家都等緊啲juicy嘢。本身曼聯已經夠多花邊新聞，依家仲嚟多個出位阿媽，真係難搞。
文：#亨少
[ 此帖被羅力亞在2022-08-11 08:43重新編輯 ]
