「人肉手榴彈」橫行英超球壇！戴納成三十二歲人卒之上位，憑住佢萬試萬靈既人肉手榴彈絕技，震驚整個英超！呢位老將今季多次施展獨門秘技，頻頻為史篤城直接或間接製造入波，昨晨「炸彈人」又再出招，助史篤城兩破有尹佩斯被逐既阿仙奴大門，炸碎兵工廠既爭標夢！
有邊個可以係球場上用手製造入波？遠既有「上帝之手」馬納當拿，近既就有坐完兩場波監既基拿甸奴，不過上述兩人既入波方法都唔多光彩，同堂堂正正用手既戴納完全唔同！呢位中場球員昨晨掟出兩個「手榴彈」，助史篤城擊敗阿仙奴爆出8倍冷W，計埋呢場波，戴納今季已先後七次為史篤城製造入球，威力驚人！
阿仙奴折4將殘陣鬥曼聯上個月史篤城輸畀愛華頓一戰，戴納兩度助攻打響名堂，有統計指「炸彈人」該仗曾經掟出一個遠達41.5碼既界外球。掟界外球掟到響晒朵，英國當地更有球迷戲言：「唔理你係巴塞定巴列特（英乙球隊），對住『戴納手榴彈』都係冇符！」戴納都話：「老實講，我既『手榴彈』比開角球更準繩，只要我掟準位置既話，根本係防不勝防。」
戴納成為史篤城擊敗阿仙奴既功臣，連帶人氣亦急升，相反兵工廠就相當頭痕，連續兩場聯賽失分後已經落後榜首車路士六分。唔單止咁，兵工廠既禾確特、沙格拿同艾迪巴約都係昨仗勇戰受傷，加埋「紅牌阿姑」尹佩斯要面臨停賽，阿仙奴下場聯賽主場對曼聯一戰，可謂充滿隱憂。
血腥手榴彈實錄11/01•贏阿仙奴2:1 入波時間：11分鐘
過程：招牌界外球掟畀富拿頭槌建功。
入波時間：73分鐘
過程：左路界外球掟畀梳爾哥斯，前者二傳畀奧路芬贊拿近門頂入。
10/29•贏新特蘭1:0 入波時間：74分鐘
過程：富拿接應界外球頂入奠定勝局。
10/05•負樸茨茅夫1:2 入波時間：48分鐘
過程：傑臣禁區內接應界外球二傳，再由富拿頭槌破網。
09/14•負愛華頓2:3 入波時間：54分鐘
過程：對方守將未能瓦解戴納過程：對方守將未能瓦解戴納既手榴彈，被奧路芬贊拿狂抽入網。
入波時間：55分鐘
過程：右路掟出界外球，逼到對方後菲臘積基爾卡擺烏龍。
08/23•贏阿士東維拉3:2 入波時間：90分鐘
過程：薛迪比接應手榴彈頂入致勝入球。
名帥嗌頭痛
史高拉利（車路士領隊）：「我一生人從來未見過呢種戰術，但係能夠製造到入波就係漂亮戰術。」
奧尼爾（阿士東維拉領隊）：「呢個『手榴彈』真係好危險，個波次次都入到小禁區六碼點，我一定要諗計應付。」
修夫基（米杜士堡領隊）：「我陣中都有一個識得掟『手榴彈』既球員，但係要好似戴納掟到入小禁區，我諗佢要半個球場助跑。」
夏利列納（熱刺領隊）：「我係修咸頓既陣已經清楚見識過『戴納手榴彈』既威力，但咁唔代表我知道點樣可以應付。」
曉士（曼城領隊）：「老實講，呢個戰術真係非常之難防範，全隊球員都唔知點樣準備，事關大家對呢個戰術都冇乜應對經驗。」
莫耶斯（愛華頓領隊）：「戴納既界外球簡直就係『人肉手榴彈』，對住佢就好似一場波輸十幾二十個角球，防不勝防。」
http://football.on.cc/football/new/20081103/fbnewb0151x0.html
