1. 弱隊充斥分組賽今屆外圍賽由過往既3圈增加至4圈，首圈由4個歐洲聯賽排名最低既冠軍對撼，並已上周中結束，晉級球隊為莫倫及聖祖利亞。之後既3輪外圍賽，各地聯賽得主與非冠軍球隊將分開作賽，即阿仙奴係有機會遇上德甲既史特加，令分組賽席位唔會再由幾大聯賽壟斷。
此外，過往要經過外圍賽洗禮既次級聯賽盟主，例如蘇格蘭、烏克蘭、土耳其及比利時等冠軍球隊，今屆都受惠於新制直接出線，再加上爆冷封王既俄超冠軍卡山魯賓、羅甲盟主烏尼雷亞等等，分組賽戲碼隨時唔及外圍賽。
2. 更易轉戰歐霸盃過往歐聯第3圈外圍賽戰敗既球隊，又或者分組賽第三名先可以降格踢歐洲足協盃，不過新一屆賽事，歐聯第3圈落敗一樣有資格轉戰歐霸盃最後一輪外圍賽，至於第4圈被淘汰既「星級」球隊，更可直入歐霸盃分組賽作為補償。
3. 16強分4日打搶收視過往歇冬後上演既16強大戰，8場比賽安排兩日進行，一晚踢4場，真係一眼關七都唔掂，不過由今屆開始，16強比賽就會拆開4日踢，球迷唔會錯過精彩大戰之餘，賽會又可以賺取更多電視廣告收益，一舉兩得。
4. 周末踢決賽方便球迷上屆決賽翌日撞正端午節公眾假期，球迷難得可以無憂無慮盡情睇波，而今屆決賽，球迷睇波一樣可以盡興，事關賽會為吸引更多球迷觀戰，決賽會安排周六（2010年5月22日）於皇馬巴拿貝球場上演，絕對係新賽制既最大德政。
http://football.on.cc/football/new/20090714/fbnewc0110x0.html
