myrmidon:呢個我同意
第一部既巨人係絕望既代名詞, 達爾文團長死過段真係超絕望
依家個個都戰狼300, 兵長舖舖千人斬 [表情]
.......
(2020-12-09 14:46) 
其實佢個命題係好高層次的。而敍事鋪陳 既技巧更加係大師級！
邊一面先係正義？邊一面先係魔鬼？墙既入面定墙既外面？
真係無答案。 視乎你係邊一面出生⋯⋯⋯你既是非對錯，原來只係純粹建立係你既身份同出生地上。 而唔係絕對既道德價值上。兩邊都係惡魔，但同時，兩邊都係受害人⋯⋯⋯
第一階級。主力由島上亞爾迪亞人既角度去睇。點樣被巨人吞食，點樣去反抗。點樣去求存。為探求新世界而犧牲。 呢一階級既展開，令讀者好單純咁就以島民既角度去睇呢個世界。 配以恐佈既壓迫感，無力感。似睇恐佈漫畫多啲。 但中間原來又埋下無數咁多伏線。你第一次睇個陣係一定會忽略的（所以前前後後，我睇左三四次先明。每去到一個階級，又要由頭翻睇一次，先搵到個堆伏線出黎，先再稍稍明白多少少個故事講咩）。
第二階級，純綷以阿倫作出發點。以佢既回憶，佢老豆既回憶，將成個故事黎一個翻天覆地既巨變。 令到讀者突然清楚哂一切來龍去胍。 巨人既來源；島民既來源。一切苦難既源頭！原來佢地唔係被惡魔吞食既受害人，佢地本身就係「惡魔」⋯⋯⋯成個世界觀唔同哂之餘。是非黑白都突然變得好模糊⋯⋯⋯
第三階級，鏡頭一轉。又轉左去島外亞爾迪亞人身上。 用萊納既角度，重新再敍述一次個故事。以島外人既角度再一次切入同一個世界觀，從而得出不盡相同既答案。 令讀者又要再一次思考誰是真正惡魔呢個命題⋯⋯
最後，島上既亞爾迪亞人要同本來係黎對付自己既，島外既亞爾迪亞人，組隊合作，去保護墙既其他民族⋯⋯⋯組隊既都係海血深仇既仇家⋯⋯⋯個份諷刺其實好入骨。
呢部漫畫要探討既野本身其實真係好高層次了。呢啲漫畫先有資格稱之為神作呀⋯⋯⋯
